المنطقة الرمادية

دي اول مرة ليا فى عالم التدوين ويمكن كمان دي اول مرة اكتب فيها او بمعنى اخر اشارك الناس معايا في نفسي لان انا طول عمري مش عايش غير مع نفسي اصحابي قليلين بس المشكلة ان انا الفترة الاخيرة ما بقاش في اصحاب فلقيت ان انا حاتجنن وانا لوحدي بالصدفة من حوالي شهرين اتعرفت على المدونات (فراغ بقى) ما اصل انا بقالي سبع شهور قاعد في البيت من غير شغل كنت عايش في السعودية من 10 سنين وطقت في دماغي وأخدت قرار الرحيل معرفش زهق خنقة قلة عقل بس الحمدلله كل حاجة بنعملها اكيد ربنا كاتب لنا فيها خير وفعلا القعدة في مصر الشهور اللي فاتت بينت للواحد حاجات كتير وخلت الواحد يفكر في الامور من منظور تاني ومعايا انا بينت معادن الناس وعرفت مين الأصيل وعرفت مين الخسيس وبدات ابص لنفسي اشوف نفسي واقف فين لقيت ان انا واقف في الحتة الرمادي اللي هي لا مع دول ولا مع دول فانا مش عارف هل اللي انا في ده طبيعي انا طبعا مش عاجبني نفسي بس المعركة المرة دي انا مستسلم راجع وجوايا حاجات كتيرة احلام خطط طموحات بس للاسف اتصطدمت انا حاسس دلوقتي باحباط فظيع بصراحة يعني مش عارف انا عايز ايه الرؤية معدومة مش شايف حاجة ادامي خالص على اي مستوي مهني علمي اسري البلد كله ماشي ببركة الله حاسس اني بافقد السيطرة. احيانا بافكر اني اغير مجال شغلي بس القي الموضوع صعب ده انا مش لاقي شغل في مجالي يبقى لما اغير ايه اللي حيحصل عايز ادرس بس منتظر اشتغل لان دي مصاريف تانية قدامي فرصة اني ارجع شغلي تاني فى نفس المكان ومفروض ارد خلال اسبوعين بس المشكلة ان المرة دي انا مش عايز اسيب مصر برغم كل اللي فيها واللي الواحد شافوا في الشهور اللي عدت بس حاسس بنفسي هنا اكتر العملية مش شغل وتجميع فلوس وخلاص بجد انا تعبت من التفكير انا الحاجة الوحيدة المبهجة في حياتي دلوقتي هما ولادي وانا شايف اد ايه هما مستريحين هنا بس خايف عليهم اوي مش عارف . كفاية كده علشان انا زهقت واللي حيقرا المدونة دي ويكتئب بلاش يدعي عليا انا عارف الناس فيها اللي مكفيها بس انا دلوقتي مرتاح نسبيا وان شاءالله حاكتب تاني